Logoadarshah
德格丹珠尔D4305ཡི་གེ་བཅུ་གཉིས་པ།
197-382a

༄༅། །ཡི་གེ་བཅུ་གཉིས་པ།
༄༅༅། །སིདྡྷི་རསྟུ། མགོན་པོ་རང་གི་གཟུགས་ཀྱི་བདག་པོ་ཁྱོད་ཀྱི་
གཟུགས་ནི། །ཡིད་འཕྲོག་དོ་ཤལ་ཕྲེང་བས་དགའ་འོས་འདི་འདྲ་གང་ན། །ཤིན་ཏུ་གདུལ་དཀའི་སེམས་ཅན་ཞི་བའི་ཆེད་དུ་འཕྲོ་བའི། །འཇིགས་རུང་རྒྱན་ཆ་ལག་འགྲོ་རབ་ཏུ་ཐོབ་པའང་གང་ན། །དབང་པོ་བར་མཚམས་མེད་པའི་མུ་ཏིག་རྣམས་ཀྱི་ཚོགས་ཀྱིས། །བརྒྱན་པ་ཁྱོད་ཀྱི་སྐུ་འདི་རབ་
197-382b

མཛེས་མ་ལཱི་ཀྴ་ཡི། །དུས་སུ་བསྟེན་པ་འོས་པ་མེ་ཏོག་ཕྲེང་བ་གསར་པ། །ལྡན་པ་ལྟ་བུར་སུ་ཡི་སྙིང་ནི་འཕྲོག་པར་མི་བྱེད། །མགོན་པོ་ཀྭ་ཡེ་གལ་ཏེ་ཁྱོད་ཀྱི་མཛེས་པ་བདུད་རྩིའི། །ཆུ་གཏེར་རླབས་ཆེན་བྱས་པར་ངལ་བ་མཆོག་ཏུ་སྟོན་ན། །འགྲོ་བའི་མིག་ནི་རབ་ཏུ་མཛེས་པར་རྟོགས་པར་
བྱེད་པར། །མངོན་པར་འདོད་པ་དག་དང་ལྡན་པར་འགྲོ་བར་བྱེད་དོ། །མཆོག་སྦྱིན་སྲིད་ལས་འདས་པར་བདག་གི་ཡན་ལག་རྣམས་ནི། །གདོན་མི་འཚལ་བར་གསལ་བ་ཁོ་ནར་དགའ་བ་དང་བྲལ། །བསྟེན་པར་འབྱུང་མོད་ཁྱོད་ཀྱི་གསུང་གི་བདུད་རྩིའི་བཏུང་བའི། །སྣོད་གྱུར་རྣ་བ་ཟུང་སྦྱར་
བ་འདི་དགའ་བའི་རྒྱུའོ། །མཐུ་སྟོབས་མཉམ་པ་མེད་པ་གང་ཞིག་ཁྱོད་ལ་བསྟེན་ཡང་། །ཞི་བའི་བདུད་རྩི་བཅུད་རྣམས་ལ་ནི་དགའ་དང་བྲལ་བ། །བླུན་པོ་གཡེངས་པའི་བློ་ཅན་བདག་ལྟ་བུ་ཡི་སྐྱེ་བོ། །མི་འབྱུང་འགྱུར་བའི་རབ་མཆོག་གཅིག་པོ་འདི་ནི་ཁྱོད་ལ་སློང་ངོ་། །ལུས་འཛིན་རྣམས་
ཀྱི་མིག་གི་དགའ་སྟོན་སྒྲུབ་ལ་ཟླ་བ། །ཁྱོད་ཀྱི་དྲིན་གྱིས་དགེ་བ་ཡང་དག་རྒྱས་པའི་དབང་ལས། །སྐྱེ་བོ་མཁས་རྣམས་སྲིད་པ་ཞིག་པ་རྣམས་ཀྱི་ལམ་ནི། །དབྱེ་བ་བརྒྱད་དང་ལྡན་པར་བདེ་བླག་ཁོ་ནར་འགྲོའོ། །ངག་གི་རྒྱལ་པོ་ཁྱོད་ཀྱི་ཞབས་ལ་བརྟེན་པའི་བློ་ཡིས། །སྙིང་པོ་ཐོབ་པའི་སྐལ་
ལྡན་རྣམས་ནི་འགྲོ་བ་ཀུན་དུའང་། །བདེ་དང་སྡུག་བསྔལ་ཁྱད་པར་འཕགས་ལ་སོགས་པའི་རྒྱུ་ནི། །སྐྱེས་པ་རྣམས་ཀྱིས་དྲན་པ་ཉམས་པར་འགྱུར་བ་མེད་དོ། །ཁྱོད་ཀྱི་ཞབས་དག་ཡོངས་སུ་བསྟེན་པར་འོས་པ་རྣམས་ཀྱི་ཡིད། །མ་ལུས་དྲི་མའི་ཚོགས་དང་བྲལ་ལས་གསལ་བའི་ངང་ཚུལ་ཅན། །རབ་
ཏུ་རྒྱས་པའི་ཡོན་ཏན་དག་གིས་ཆེ་བའི་བློ་གྲོས་དག །ཕུན་ཚོགས་རང་བཞིན་བདེ་བ་ཅི་ཡང་འགྲོ་བར་སྐྱེད་པར་བྱེད། །དག་པར་བྱས་པའི་གསེར་ལྡན་མཛེས་པའི་སྐུ་ཅན་མཆོག་ཏུ་སྒེག །གསལ་བའི་གསུང་གི་ངང་མོ་རྣམས་ཀྱིས་བསྟེན་བྱ་རྒྱལ་བ་ཡི། །ཡིད་མཚོར་པད་སྡོང་ལྡན་པ་གཅིག་པོར་
ངང་པ་སྙན་སྒྲོགས་ཏེ། །འཇམ་པའི་དབྱངས་ཞེས་གྲགས་པས་འདིར་ནི་ཁྱོད་ལ་བསྲུང་གྱུར་ཅིག །མགོན་པོ་བཟོད་པར་དཀའ་བའི་ཉོན་མོངས་འདི་གསུམ་རྣམས་ལ་ནི། །རྣམ་པར་དཔྱོད་པ་ཕྲ་མོ་དག་ཀྱང་གལ་ཏེ་བྱ་དཀའ་བར། །གསལ་བར་འགྱུར་ན་འཇིག་རྟེན་གསུམ་པོ་འདིར་ནི་མིག་དང་ཡིད། །
197-383a

དགའ་བྱེད་སྐུ་འདི་འདྲ་བ་ཐོབ་པ་ངེས་པར་གང་ན་ཞིག །ཆེ་བའི་འོད་ཟེར་འཕྲོ་བའི་རིན་ཆེན་ཚོགས་རྣམས་འཛིན་པ་ཡི། །ཆུ་ཡི་གཏེར་དུ་ཆུ་རྣམས་རྣམ་པར་གསལ་བར་བྱས་ནས་ནི། །གལ་ཏེ་ངེས་པར་བལྟ་བར་གྱུར་ན་ཁྱོད་ལྟ་བུ་རྣམས་ཀྱི། །སྐུ་ལ་མཛེས་པའི་རྒྱུན་ནི་རབ་མཛེས་འདི་ལྟ་བུ་
འདི་ཡང་། །མགོན་པོ་ཟབ་མོའི་སྒྲ་དབྱངས་མཐོན་པོ་རྣམས་ཀྱིས་ཁྱོད་ལ་གང་། །ཡིད་འོང་བདུད་རྩིའི་རྒྱུན་རྣམས་འབེབས་བྱེད་དགའ་དང་སྐལ་བཟང་དག །སྤྲོ་བྱེད་སྤྱོད་ཚུལ་ཤིན་ཏུ་ཡིད་འོང་དབྱར་གྱི་ཆུ་འཛིན་གྱི། །རྗེས་སུ་གསལ་བར་འགྲོ་སྟེ་དེ་ཉིད་རྨ་བྱ་མྱོས་བྱེད་ཀྱང་། །དཔྱིད་ཟླ་བཞིན་དུ་
ཁྱོད་ལ་འགྲོ་བ་གསུམ་པོ་རབ་དགའ་བ། །བླ་མེད་སྐྱེད་བྱེད་ཨུཏྤལ་ཤིང་གི་ཡལ་ག་མིག་གི་ནི། །མཛེས་པའི་མེ་ཏོག་གིས་མཐོང་སྦྲང་རྩིས་མྱོས་པ་བུང་བ་ཡི། །སྒྲ་རྣམས་འཇམ་པའི་དབྱངས་བྱེད་ཚུལ་ཅན་འདི་ཡིས་རྒྱལ་གྱུར་ཅིག །ཁྱད་པར་འཕགས་པའི་ཡོན་ཏན་ཀུན་གྱིས་དགའ་བ་མཆོག་རབ་ཐོབ་
པ་ཡི། །ཤེས་ལྡན་སྦྲང་རྩིའི་བརྟུལ་ཞུགས་རྣམས་ཀྱིས་ཉེ་བར་བསྒྲགས་པར་བྱ་བ། །རྒྱལ་བའི་ལུགས་ཀྱི་རྒྱན་དུ་གྱུར་པ་ཁྱོད་ཀྱི་སྤྱོད་ཚུལ་ཁོ་ན། །དཔྱིད་ཀྱི་ཐིག་ལེ་ཙཱུ་ཏ་གསར་པ་དག་ནི་མིན་ནམ་སྙམ་མོ། །གདོང་པ་བསྐྱོགས་པས་གདོང་ཕྱོགས་རི་དགས་བདག་པོའི་རྒྱལ་ལ་བཅིབས་པ། །
ཐུགས་རྗེས་ཤིན་ཏུ་མཆོག་ཏུ་གྱུར་ཅིང་མངོན་པར་མཐོ་བའི་རྩ་བ། །རབ་ཏུ་མཛེས་པ་ཉིད་ཀྱིས་གསེར་དང་ཁ་བའི་རྐང་པ་བཟུང་བ། །སྨྲ་བའི་རིགས་ཀྱི་ལྷ་ཉིད་ལ་ནི་དལ་བུ་མིན་པར་ཕྱག་འཚལ། །སྤྲོས་པ་མཐའ་དག་རབ་ཏུ་ཞི་བར་གྱུར་དང་སྒྲིབ་པ་མེད་པས། །རབ་ཏུ་རྒྱས་པའི་བློ་དང་ཏིང་ངེ་འཛིན་གྱི་
བདུད་རྩི་བསྟེན་པ། །ཁྱེད་ཀྱི་ཐུབ་པའི་སྤྱོད་ཚུལ་མི་ཕན་འཇོམས་པའི་རྣམ་པར་གནོན་པས། །གཞན་གྱིས་མི་ཐུབ་པ་ཡི་སྲིད་པ་གསུམ་རྣམས་འདུལ་བར་བྱེད་དོ། །རབ་ཏུ་འཇིགས་སུ་རུང་བའི་ཡུལ་ཅན་རྣམས་ཀྱི་བརྩེ་བ་མེད་པའི། །སྤྱོད་པས་རབ་ཏུ་ཞི་བ་སྒྲུབ་པའི་ཆེད་དུ་འགའ་ཞིག་ཏུ་ཡང་། །ཐུགས་
རྗེས་ཁྱོད་ཀྱི་ཕྱག་གི་ཡོངས་འཇོམས་ཕྲེང་བ་བཞིན་དུ་འཇིགས་རུང་། །རྣམ་པ་སྣ་ཚོགས་མཚོན་ཆ་སྒྲོགས་པར་བྱེད་རྣམས་རྣམ་པར་རོལ་ལོ། །མཆོག་སྦྱིན་དགེ་ལེགས་ལོངས་སྤྱོད་དང་ནི་ཡུལ་ལ་ཆགས་པ་བྲལ་བ། །འཁྲུལ་པ་མེད་དང་བདུད་རབ་འཇོམས་དང་སྲིད་གསུམ་ལ་ཕན་ཕུན་སུམ། །ཚོགས་
197-383b

པའི་གོ་འཕང་ཐོབ་དཀའ་མི་འཕྲོགས་མངོན་པར་འདོད་པ་རྣམས་ཀྱི། །དེ་ཡང་ཁྱེད་ལ་གུས་པ་ལ་སྟེ་ལམ་གཞན་གནོད་མེད་མེད་དོ། །གལ་ཏེ་དབང་པོ་རྣམས་ནི་བསྡམས་པས་འགའ་ཞིག་དག་ཏུ་གུས་པ། །གཡོ་བ་མེད་པའི་བློ་ཅན་ཁྱོད་ཀྱི་ཆ་ཤས་ཅི་ཡང་བསྒོམས་ན། །སྐྱེ་བོ་འདི་ལ་རིང་པོར་མི་ཐོགས་
ཆུ་གཏེར་སྐ་རགས་དག་གིས། །བརྒྱན་པའི་ནོར་འཛིན་འདི་ནི་རང་ཉིད་ངེས་པར་འདམ་པར་བྱེད་དོ། །ཁྱོད་ཀྱི་འདུན་སར་འཆི་མེད་བུད་མེད་རྣམས་ནི་ངེས་པར་ཡང་བྱས་ཀྱང་། །མཛེས་པ་འདོད་པ་བཞིན་དུ་རྡུལ་གྱིས་གང་བས་རྣམ་རོལ་སྤུ་ལོང་རྣམས། །མཆོག་ཏུ་ཐོན་པ་རྣམས་ཀྱི་ནུ་མ་གས་ཤིང་སྐ་
རགས་ཆེས་ཆེར་བཅིངས་པ་ཡི། །སྟོབས་ཅན་ཆེས་ཆེར་འདར་བའི་འདོད་ལྷའི་རྣམ་པར་བསྒྱིངས་པ་འཛིན་པར་བྱེད། །གང་གི་ཡན་ལག་རྣམས་ཀྱིས་དཔེ་ཡོད་མིན་པའི་དགའ་འོས་བསྟེན་པ་ཡིས། །མཆོག་ཏུ་རྒྱ་ཆེའི་གཟུགས་གཞན་མ་ལུས་རྣམས་ལ་དགའ་བར་འཕྲོག་པར་བྱེད། །སྐུ་ལུས་ཉམས་པ་མེད་
པ་དབང་པོའི་མདའ་རྟེན་རྣམ་པར་འདུལ་བ་ཡི། །གཞི་ཡི་མཆོག་རབ་སྣ་ཚོགས་འོད་ཟེར་ཕྲེང་བ་ལྡན་འདི་རྒྱལ་གྱུར་ཅིག །རྒྱལ་བའི་ཁུར་བུ་ཞལ་གྱིས་མཆེས་པ་ཁྱོད་ཀྱི་འདུན་སར་དགའ་བ་ཡིས། །ཏིང་ཏིང་ལྕགས་དང་མ་འབྲེལ་མེད་པར་བསྒྲགས་པའི་སྒྲ་སྙན་ཕྲ་མོ་ཡིས། །རྣམ་པར་བསྲེས་པའི་
རྒྱུད་མ་བསྐྱོད་པ་མཛེས་པའི་ལྔ་པ་ལྟ་བུ་དག །རང་གི་ཆེ་བ་འདོད་པའི་ཚུལ་ཅན་སྒྲ་དབྱངས་སྲེད་པ་འཆད་པར་བྱེད། །མགོན་པོ་འགྲོ་བ་ཕམ་པར་བྱེད་པའི་གླང་པོ་གཡོ་མེད་བྱེད་པ་ཡི། །ལྕགས་སྒྲོག་དྲ་བ་ལྟ་བུའི་དཔུང་རྒྱན་དག་གིས་བརྒྱན་པར་བྱས་གྱུར་ཅིང་། །ངན་འགྲོའི་ལམ་གྱི་སྒོ་གཏན་ཆེན་པོ་
རབ་དྲེགས་ཡིད་སྲུབ་འཇོམས་བྱེད་པ། །བདེ་བར་གཤེགས་པའི་དགའ་བ་ཁྱོད་ཀྱི་ཕྱག་གི་ལྗོན་ཤིང་རྒྱལ་གྱུར་ཅིག །བདག་པོ་ཁྱོད་ཀྱི་མཆོག་ལས་རྣམ་པར་རྒྱལ་བས་ཡང་དག་བསགས་པ་ཡི། །གྲགས་པའི་དཔལ་ནི་སྲིད་པའི་སྤྱི་བོར་ཆེ་བའི་ཡོན་ཏན་ཕུན་ཚོགས་པ། །འབྱུང་བར་བྱེད་པ་དྲི་མ་
མཐའ་དག་རྣམ་པར་བྲལ་བས་གཙང་བ་ཡི། །རྗེས་སུ་སྟོན་ཀའི་རི་བོང་ཅན་གྱི་ཆ་ཤས་དག་གིས་འགྲོ་བར་བྱེད། །དྲི་བཟང་དག་ལ་གསལ་བར་འདུས་པའི་སྦྲང་རྩིར་བྱེད་པའི་ན་ཆུང་རྣམས། །འཁོར་བ་བཟོད་པ་བདེ་བར་གཤེགས་པ་སྔོན་པོའི་བདེ་བ་འཕེལ་བྱེད་པའི། །ཕྲེང་བ་རོ་ཡི་ཁུ་བ་ལྡན་པ་འཆི་
197-384a

མེད་བདག་པོའི་བུད་མེད་ཀྱིས། །རྣམ་པར་བཀོད་པ་འདི་ནི་ཁྱོད་ཀྱི་སྤྱི་བོར་རྣམ་པར་རོལ་པར་བྱེད། །གང་ཕྱིར་བརྩེ་ལས་འདས་བློ་ཅན་ལ་སྡོམ་བརྩོན་མིན་པའི་གོ་འཕང་བགྲོད། །འགྲོ་བ་གཞན་ལ་ཕན་པའི་མཁས་པ་རྣམས་ནི་རབ་ཏུ་རྒྱས་པར་མཛད། །ཅེས་ཏེ་ཁྱེད་ཀྱི་
ཡོན་ཏན་ཁ་བ་བསགས་པའི་མཛེས་པས་ནམ་མཁའ་ཡང་། །རང་གི་ནོར་བུ་ཉི་མ་ཉེ་བར་བཅོམ་པ་ཅན་ནི་སྐྱེད་པར་བྱེད། །ཤིན་ཏུ་དགའ་བར་མཛད་པའི་གསུང་ཅན་རྒྱུན་ཆད་མེད་པར་གསར་པ་དང་། །གསར་པར་བསྟོད་པ་སྡོམ་བརྩོན་ལེགས་པར་བསྡམས་པ་མཆོག་རྣམས་དག་གིས་
ནི། །ཡོན་ཏན་བགྲང་བྱ་མིན་པ་ཁྱོད་ཀྱི་ཡོན་ཏན་ཚོགས་ཀྱི་ཚད་རྣམས་ནི། །ཆུ་གཏེར་རྣམས་ཀྱི་ནོར་བུའི་ཚོགས་ཀྱིས་ཇི་ལྟར་ཡང་དག་འཇལ་བར་བྱེད། །ཐུགས་རྗེ་ཤིན་ཏུ་ཆེ་བ་བྱིས་པའི་བློ་ཅན་རྣམས་ཀྱིས་བཀོད་པའི་སྐྱེ་བོ། །མཐའ་དག་རྣམ་མང་རྣམས་ཀྱི་སྣ་ཚོགས་བློ་ཡི་
རོལ་པ་བྱེད་པ་རྣམས་ཀྱིས། །གཡོ་བ་མེད་པས་བརྟན་པ་མ་ལུས་འགྲོ་བ་ལ་རུང་ལོངས་སྤྱོད་རྣམས་ཀྱི། །ས་གཞི་ལྟ་བུ་ཁྱོད་ཀྱི་སྐུ་ལུས་འདི་ཡིས་འདིར་ནི་རྒྱལ་བར་གྱུར་ཅིག །བླུན་པོའི་བློ་ཅན་རྣམས་ཀྱི་ངོར་ནི་ཐུགས་རྗེ་ཡང་དག་ལྷག་ཅིང་ལྕི་བ། །དགེ་ལས་བྱུང་བ་ཡང་དག་
ཚོགས་པ་ཕྱག་གི་མཐིལ་དུ་ཨུཏྤལ་བསྣམས་པ། །རྒྱལ་བའི་རིགས་ཀྱི་ས་ཡི་ཁོར་ཡུག་རྣམས་ནི་ཁྱོད་ཀྱི་ཁུར་བུར་བསྐུར་བར། །དཀའ་བ་མིན་ཞེས་འདི་ན་བློ་གྲོས་ཆུང་ངུ་རྣམས་ཀྱང་སྒྲོགས་པར་བྱེད་དོ། །མགོན་པོ་ནམ་མཁའི་བར་དུ་བཀྲམ་པའི་ཆང་གི་དྲི་བཟང་བསྣམས་པས། །
གསང་མཐོར་སྨྲ་བ་མྱོས་ཤིང་སྒྲོགས་པའི་ལག་ལྡན་ཚོགས་རྣམས་འཇོམས་པར་བྱེད་ཅིང་། །སྒྲོགས་ལ་འབད་པས་སྤྲིན་ལས་རྒྱལ་བ་གླང་ཆེན་དབང་པོའི་རྣམ་པར་རོལ་པ། །རྒྱ་ཆེ་བ་ནི་སྣ་ཚོགས་ནགས་ཀྱི་ནང་འདི་རྣམས་སུ་འཛིན་པར་མཛད་དོ། །འགྲོ་ལ་ཕན་པ་བསྒྲུབ་པར་
བྱ་བའི་བློ་ཡིས་གོ་ཆ་བཅིངས་པ་ཁྱོད་ལ། །ཡོངས་གདུང་ཕྲ་མོ་གང་ནའང་ཅི་ཞིག་ཀྭ་ཡེ་དམ་བཅས་ཉམས་པ་མེད་པ། །གང་ཕྱིར་བདུད་ཀྱི་ཆུང་མའི་སྐྱེ་བོའི་ལག་པ་དག་ནི་འདོད་པར་འོས་པའི། །འགྲམ་པའི་གཞི་ལ་མཁུར་རྩི་གསར་པ་འགོད་པར་བྱེད་ལ་ལེ་ལོ་ཁོ་ནའོ། །དཔེ་མེད་
197-384b

དགའ་འོས་གཟུགས་ཅན་མྱ་ངན་རྣམ་པར་བསལ་བའི་རྒྱལ་བའི་ཚོགས་རྣམས། །གཟིགས་པ་ཁྱོད་ཀྱི་གཞོན་ནུའི་རོལ་པ་གསེར་བཟང་གིས་ནི་སྟག་གི་སེན་མོའི། །རི་མོ་བྲིས་ཤིང་རབ་མཛེས་ཟུར་ཕུད་ལྔ་རྣམས་རྣམ་པར་བཀོད་པར་བྱས་པ། །འདི་ཡིས་འཇིག་རྟེན་སྐྱོང་བ་བརྒྱད་པོ་རྣམས་ནི་ལྷག་པར་
དགའ་བར་མཛད་དོ། །ཇི་ལྟར་འདིར་ནི་ཁྱོད་ཁོ་ན་ལ་མཆོག་གི་ཉམས་ཀྱི་ཁྱད་པར་རབ་འདོད་པའི། །འབྱོར་པ་མ་ལུས་བདེ་བའི་ཡལ་གའི་རྩེ་མོ་ལྡན་པ་ཡང་དག་འབྱུང་འགྱུར་བ། །དེ་ལྟར་བདག་གིས་ཡོན་ཏན་རྣམས་ཀྱིས་ཤིན་ཏུ་ཁྱབ་པ་ལྟ་བུར་འགྲོ་རྣམས་ཀྱི། །ཅི་ཞིག་ལྟར་གྱུར་ཅིག་ཅེས་ཁྱོད་ཀྱི་འདུན་
ས་དལ་བུས་འདིར་ནི་ཡོངས་སྨིན་གྱུར། །འཆི་མེད་རི་བོའི་ལྟོ་བ་ལྟ་བུར་བྲང་གི་གཞི་ནི་རྣམ་པར་ཡངས་པ་ཅན། །ཞབས་ཀྱི་ཡལ་གའི་འོད་ཟེར་ཐང་ལས་སྐྱེས་པའི་པདྨའི་ནགས་ཀྱི་གཟུགས་བརྙན་ཏེ། །སྣང་བར་བྱེད་པ་བརྒྱ་ཕྲག་རྣམས་ལས་ལྷག་པར་གསལ་བའི་གཟི་ཡིས་བརྒྱན་བྱས་པ། །མཐར་བྱེད་དྲེགས་པ་
འཇོམས་བྱེད་སྲིད་གསུམ་མགོན་པོའི་ས་རྣམས་འཛིན་པ་རྒྱལ་གྱུར་ཅིག །རྣམ་པར་རྨོངས་པ་རྒྱ་ཆེའི་མུན་པའི་ཚོགས་ཀྱིས་ངེས་པར་བཅིངས་པ་རྣམས་ཀྱིས་ནི། །ཁྱོད་ཞབས་པདྨ་དག་ནི་བསྟེན་པའི་དགའ་སྟོན་བདེ་ལ་གལ་ཏེ་མི་གུས་ན། །ས་འོག་ཕུག་པ་རྒྱ་ཆེ་སྲིད་པ་དོག་པོ་རྣམས་སུ་གནས་པ་དོན་མེད་ཅིང་། །ཡུན་རིངས་
བདུད་རྣམས་ཀྱིས་ནི་བཅོམ་མོ་གཞོན་ནུ་རྒྱལ་བའི་རིགས་ཀྱི་ཉི་མ་ཀྱེ། །བདག་པོ་ཕྱོགས་སུ་ལྗིད་པའི་བརྩེ་བ་བསྟེན་པའི་སྡོམ་བརྩོན་རིགས་ཀྱེ་ཁྱོད་ལ་ནི། །མཆོག་ཏུ་འདུས་པ་རྣམས་ཀྱིས་ཚེ་ནི་ཤིན་ཏུ་གཡོ་བ་འདི་རྣམས་བསྐུལ་བ་ནི། །བརྒྱ་ཕྲག་རྣམས་སུ་ཉེ་བར་བསྒྲུབས་པའི་འབྲས་བུ་ཆེན་པོ་ལྟ་བུར་རྣམས་བྱས་ཏེ། །
ཆུ་སྐྱེས་འདབ་མ་ལྟུང་བའི་ཆུ་ནི་རྒྱན་དུ་རུང་བའི་དངོས་པོར་གྱུར་པ་བཞིན། །མཆོག་སྦྱིན་ཁྱོད་ཀྱི་ཡོན་ཏན་རྣམ་པར་རྒྱས་དང་འདྲིས་པས་དག་པར་བྱས་པ་ཡིས། །ངག་གི་འབྱོར་པ་ཅན་ནི་སྦྲང་རྩིའི་རང་བཞིན་སྙན་ཚིག་གཞི་དང་དགའ་ལྡན་པའི། །མཆོད་སྦྱིན་ལྡན་དང་རྣ་བའི་བདུད་རྩིར་མངོན་པར་མཆོད་པའི་གཞིར་
གྱུར་ངེས་བརྗོད་ཀྱི། །བུམ་པ་ཅན་གྱི་ཞལ་ནི་ཞལ་བཟང་བྱེད་པོ་དེ་གཅིག་པུ་ཡིས་ཀུན་དུ་ཐོབ། །དབང་པོ་སྲིད་པ་གསུམ་གྱི་དགའ་བ་རབ་སྟེར་རྒྱལ་བའི་བརྩོན་འགྲུས་དཔྱིད་ལ་ནི། །ལྷན་ཅིག་བྱེད་པ་འཕྲོ་བ་ཉིད་ཀྱིས་མཆོད་པར་གྱུར་པར་ཁྱོད་ཀྱི་བྱ་བ་ཡིས། །གསུང་རབ་སྙེ་མ་རྣམས་ལས་ཟག་པ་ཞི་བ་བདུད་རྩིའི་
197-385a

བཏུང་བའི་དགའ་བ་ཡིས། །སྡོམ་བརྩོན་རྐང་དྲུག་པ་དང་མཁས་པ་སྙན་པར་སྒྲོགས་པའི་ཁུ་བྱུག་གསོ་བར་བྱེད། །སྨྲ་བ་མང་པོའི་གཉིས་འཐུང་འཇོམས་མཛད་བདེ་བར་གཤེགས་པའི་ཐུགས་ཀྱི་ས་འཛིན་གྱི། །ཕུག་པ་ཟབ་པའི་ཁང་པ་ལྡན་པ་སྲིད་པ་གསུམ་གྱི་ནགས་ཀྱི་ལྷག་པ་ཡི། །
དབང་པོ་འགའ་ཞིག་ཏུ་ཡང་ཁྱོད་ཀྱི་འཇིགས་པས་བདུད་ཀྱི་གཏུམ་པོའི་དཔུང་ཆེན་ནི། །རྩེད་མོའི་རི་ཡི་རྒྱ་མཚོར་བལྟམས་པ་རི་དགས་མོ་ལྟར་རིང་དུ་འབྲོས་པར་བྱེད། །མགོན་པོ་རྣམ་པར་གནོན་པར་གྲགས་པ་གདུལ་བར་དཀའ་བ་རྣམས་ནི་གདུལ་བ་ཡི། །ཆེད་དུ་འགའ་ཞིག་ཏུ་ཡང་ཐུགས་རྗེའི་ཤུགས་ལས་
གང་གི་ཞབས་ཀྱི་རྩེ་མོ་ཡིས། །ཉན་པར་འདོད་པ་འཇིགས་བྱེད་དུ་བའི་སྒྲ་ལས་གཅིག་ཏུ་འཇུག་བྱེད་འཇིག་རྟེན་གསུམ། །དམན་ཡང་མནན་འདི་ཐིམ་དང་མྱུར་དུ་རང་གནས་མིན་པར་འགྲོ་བྱེད་སྐུ་འཛིན་བྱེད། །དགེ་བའི་འབྲས་བུ་ལྟ་བུའི་བུམ་པ་བཟང་པོ་རྣམས་འཛིན་གཙོ་བོ་དཔག་བསམ་ཤིང་གིས། །མཛེས་པ་ཕུན་
སུམ་ཚོགས་པར་གང་གྱུར་དེ་ཉིད་སྤྱི་བོར་བླ་མ་གཅིག་གིས་བསྐྱེད་དེ། །བཤད་པར་མཛད་པས་གཡོབ་པའི་ཕྱག་གི་ཕྱག་སྐྱེས་རྣམས་ཀྱི་མཆོག་ཏུ་གསལ་བ་དཔུང་པའི། །ཡལ་ག་འདི་ནི་མེ་ཏོག་རྒྱས་པའི་འཁྲི་ཤིང་རླུང་གིས་གཡོ་བ་ལྟ་བུར་སྣང་ངོ་། །མ་ལུས་སངས་རྒྱས་རིགས་ཀྱི་རྙོག་པ་མེད་པའི་ཆ་ཤས་
གཏེར་གྱི་སྤྱོད་ཚུལ་འདི་རྣམས། །གལ་ཏེ་སྙིང་ལ་ཀུན་ནས་ཀུན་ན་གྲང་བ་ཆེན་པོའི་དོ་ཤལ་ཉམས་པར་འགྱུར་ཏེ། །གལ་ཏེ་ལྕེ་ཡིས་ཇི་ལྟར་འདོད་པར་བྱས་ན་སྤྲིན་གྱི་སྙིང་པོའི་གྲགས་པ་ཅི་ཞིག །གལ་ཏེ་རྣ་བ་གང་བར་བྱས་པར་གྱུར་ན་ནོར་བུའི་རྣ་རྒྱན་ངེས་པར་བཅོམ་ལགས། །བསོད་ནམས་ཚོགས་རྣམས་ཉེ་བར་
བསགས་པ་མཉམ་པ་མེད་པའི་བདག་ཉིད་ཆེན་པོ་ཁྱོད་ཀྱི། །ཞབས་གདན་ནོར་བུའི་རང་བཞིན་དག་གི་སྟེགས་ནི་བདེ་སོགས་ལག་པའི་མཐིལ་གྱི་བདེ་བ། །སྟེར་བའི་བསྙེན་བཀུར་བྱེད་པ་རྣམས་ཀྱིས་མ་ཚིམ་གྱུར་པ་བཞིན་དང་མཆོད་སྦྱིན་བརྒྱ་བ། །འདུད་པ་ན་ནི་མགོ་ལས་ཏཱ་མ་ལ་ཡི་ལོ་མ་ཐོབ་སྟེ་རང་ཉིད་གསལ་ལོ། །
གཞན་གྱི་དོན་ལ་གནས་པ་ཤིན་ཏུ་བརྟན་ལྡན་རྣམས་ཀྱི་དབང་པོ་སྣ་ཚོགས་ཐུགས་རྗེ་ཡི། །སྒོ་ནས་འདུས་པའི་སྣ་ཚོགས་འདོད་ལྡན་ཉམས་ཀྱི་གནས་གྱུར་གསོན་ཅིག་བདག་གིས་རིགས་ལགས་སོ། །བླ་མ་གང་གིས་བདག་གི་སྡིག་པ་རྣམ་པར་བསྒྱིངས་པ་ཀུན་ནས་མུན་པར་བྱེད་པ་རྣམས། །འཕྲོག་བྱེད་དག་བྱེད་རྣམས་
197-385b

ཀྱི་དག་བྱེད་གནས་སྐབས་དེ་ནི་སྐད་ཅིག་ཙམ་ཡང་བསྒྲུབ་པར་མཛོད། །རྒྱལ་བ་མཆོག་གི་རིགས་ཀྱི་ཆུ་གཏེར་འཕེལ་ལ་བདུད་རྩིའི་འོད་ཅན་ཤེས་རབ་མཛེས་མ་དང་། །འགྲོགས་ལ་ཡིད་སྲུབ་གཏམ་ལ་མི་གུས་འཇིགས་རུང་འཁྲུལ་པའི་མཚན་མོ་ཡོངས་སུ་འདུས་པ་ལ། །ཉི་མའི་བརྟུལ་ཞུགས་འཛིན་པ་སྣ་
ཚོགས་ཉོན་མོངས་རི་དགས་ཡང་དག་འཇོམས་པ་སྒྲུབ་ལ། །སྟག་གིས་རྣམ་པར་རྩེན་པའི་དཔལ་ནི་ཁྱེད་རྣམས་དག་ལ་རྟག་ཏུ་བསྲུང་བར་གྱུར་ཅིག །དྲི་མེད་སྟོན་ཀའི་ཟླ་བའི་འོད་ཀྱིས་ཡོངས་བསྐོར་ཟླ་བའི་གཟུགས་ལས་མ་ལུས་དགའ་བར་བྱ་ལ། །རིན་ཐང་མེད་པའི་འཛུམ་པའི་ནོར་ལྡན་ཞལ་ཅན་དྲག་པོའི་གདོན་
རྣམས་གདུལ་བ་ཐུགས་རྗེ་ཉིད་ལས། །འབད་མཛད་ཁྱོད་ཀྱི་ཁམས་གསུམ་རྣམ་པར་རྒྱལ་བའི་གནས་སྐབས་ནང་གི་སྐྲག་པའི་མྱུ་གུ་ལྟ་བུར། །ལུས་སྐྱེས་ལང་ལོང་གྱུར་པའི་ལྷ་ཡི་ཐུབ་པའི་ཚོགས་རྣམས་དག་གིས་མཐོང་ནས་ཉམས་པར་གྱུར་ཏོ། །འཇིགས་པས་ཉམས་པའི་གཞོན་པ་རྣམ་དག་ཤིན་ཏུ་རིང་པར་
བྲལ་ཞིང་བརྟན་པའི་ཆེད་དུ་འོངས་པའི། །འཆི་མེད་རྣམས་ཀྱི་གུས་པ་ལྕི་བ་ཁྱད་འཕགས་ཡིད་ནི་གསལ་བར་བྱེད་ལ་རྒྱུ་དང་འདྲ་བ། །ཤུགས་སྟོབས་མཁའ་ལྟར་དཔག་ཏུ་མེད་པ་དུས་མཐའི་སྤྲིན་གྱི་སྒྲ་ལས་ལྷག་པའི་སེང་གེའི་སྒྲ་ཅན། །བདུད་རྣམས་ཡོངས་སུ་ཉམས་པར་བྱས་པ་ཁྱོད་ཀྱི་སེང་གེའི་རྣམ་པར་རོལ་པ་
འགྲོ་ལ་གྱུར་ཅིག །ཚོགས་རྣམས་ལ་ཁྱབ་སྟོན་ཀའི་ནམ་མཁའི་དཀྱིལ་ལྟར་ཤིན་ཏུ་དག་པའི་བློ་ཡི་ལྷག་པར་བསྟེན་པ། །བཟོད་དཀའི་གདུང་བས་འཁྲུགས་པའི་དཔག་མེད་སེམས་ཅན་ཁམས་ཀྱི་དབང་གྱུར་ཐུགས་རྗེ་དམ་པས་ཕྱུག་པ། །ཡང་དག་བསྐྱེད་དང་མྱ་ངན་འདས་ལ་རྟག་ཏུ་མི་གནས་གསུང་ལྡན་རྣམས་
ཀྱི་མཆོག་ཏུ་གྱུར་པ། །སྤྱོད་ཚུལ་འདི་འདྲ་བ་ནི་མིང་ཙམ་གྱིས་ཀྱང་གཞན་གྱི་གྲུབ་པར་མངོན་པར་འགྲོ་བ་མ་ལགས། །དྲག་པོར་གདུང་བས་རྣམ་པར་བཞུ་བའི་ལྕག་གི་ཟེར་དང་འདྲ་བའི་མིག་ཟུར་སྡོམ་པའི་སྐད་ཅིག་ལ། །སྣ་ཚོགས་ཡང་དག་འཕྲོ་བ་དབང་གྱུར་ཕྱོགས་བཞིའི་དབང་ཕྱུག་རང་བཞིན་གྱིས་མཐོར་སྐྱེས་པའི་
བདག་ཉིད་ནི། །རྣམ་པར་འཕྲུལ་པའི་སྤྲོས་པ་རྒྱས་པ་སྤྲོ་བྱེད་མདའ་ལྔ་པ་ནི་འཇོམས་བྱེད་རྣམས་དང་མཛེས་མ་ཡི། །སྐྱེ་བོ་བཅུ་ཡི་བདག་ཉིད་ཀྱིས་ཀྱང་རབ་ཏུ་འདོད་བྱའི་ངོ་མཚར་དཔལ་ནི་ཅི་ཡང་རྒྱས་པར་བྱེད། །མ་རིག་མངོན་པར་བཅོམ་པ་ཁྱོད་ལ་མཆོད་པར་འདོད་པའི་རིག་འཛིན་བུ་མོ་དྲི་བཟང་གིས་བཀུག་
197-386a

པའི། །བུང་བའི་ཚོགས་རྣམས་དགའ་བས་སྒྲོགས་ཤིང་མཆོག་ཏུ་རོལ་པའི་མེ་ཏོག་ཕྲེང་བ་འཛིན་མ་མཛེས་མ་ཡི། །འོད་ཟེར་སྤྲོ་མ་རྣམས་ཀྱིས་ནམ་མཁའ་ཀུན་ཁྱབ་པ་ནི་མིག་གི་ཟུར་མིག་མཛེས་པ་བསྟེན་པ་ཡིས། །རབ་རྒྱས་ཀུནྡའི་ཚོགས་ཀྱིས་རབ་དཀྲིགས་བཞིན་དང་རྡུལ་ཟགས་ཡན་
ལག་བརླན་པས་ཡང་ཡང་བཀྲུས་པ་བཞིན། །དབང་པོ་བཅོམ་ལྡན་བླ་མར་གུས་པ་ཉིད་དག་ཚིག་གིས་རྟོགས་བྱ་མིན་པ་ཡོན་ཏན་རྒྱ་མཚོ་གང་ཞིག །སྲིད་པའི་ལམ་དུ་འགྲོ་བའི་སྐྱེ་བོ་ཁྱོད་ཀྱི་མཚན་གྱི་རང་བཞིན་གླུ་དབྱངས་རྟག་ཏུ་ལེན་པ་འདིས་ནི། །གཟུགས་དང་སྐྱེ་ཚུལ་དང་ནི་རྣམ་པར་འབྱོར་དང་རྣམ་གནོན་
ཁྱད་འཕགས་ཕུན་སུམ་ཚོགས་མཐའ། །སྒྲོགས་པའི་གྲགས་པ་དྲི་མ་མེད་པ་སྟོན་ཀའི་ཟླ་ལྟར་མཆོག་ཏུ་རབ་མཛེས་ངེས་པར་བདེ་བླག་སྒྲུབ་བོ། །ངག་གི་དབང་ཕྱུག་མཆོག་སྦྱིན་ཁྱོད་ལ་ནོར་གྱི་ཡུལ་ལ་དགའ་དང་བྲལ་བར་གཏོར་མ་མཐའ་གཅིག་ཉེར་བསྒྲུབས་པའི། །བློ་གྲོས་བཟང་པོས་བདུད་རྩིའི་རྒྱུན་གྱིས་
བཀྲུས་པར་གྱུར་ཅིང་སྟེང་དུ་འཁོར་ལ་རབ་ཆེར་མྱོས་པ་གླུ་ལེན་པའི། །སྦྲང་རྩི་བྱེད་པའི་ཚོགས་ལྡན་དགའ་བའི་རོལ་པའི་གནས་གཅིག་ཐུབ་པའི་ཡིད་ནི་རྣམ་པར་འགྱུར་བར་བྱེད་པ་ཡང་། །སྟོབས་ཡོད་གྱུར་པའི་ལོངས་སྤྱོད་དཔལ་ལྡན་ཉིད་ཀྱིས་རྩེན་པ་མཐོ་རིས་རྣམས་སུ་ངེས་པར་ཉམས་སུ་མྱོང་བར་བྱེད། །
སྟོབས་རྣམས་ཀྱི་གཏེར་ཁྱོད་ཉིད་གཅིག་པུ་སྐྱབས་བྱས་མི་ནི་ཆང་གི་ལྕི་བའི་འགྲམ་པས་བསྒྲགས་པ་རབ་མཐོ་བའི། །སྤྲིན་དག་ཕམ་བྱེད་གླང་ཆེན་དབང་པོའི་ཚོགས་ཀྱི་དྲི་མ་ཅན་གྱུར་རྣོ་བྱས་མཐའ་དག་མཚོན་ཆའི་འོད་ཟེར་དག །འཕྲོ་བའི་གོས་དག་བཅིངས་པའི་རྐང་ཐང་ཚོགས་ཅན་རབ་མཆོག་ཤིང་རྟ་
བཞོན་པའི་དམག་མི་བཟང་ལྡན་ཡིག་འཕྲོག་པའི། །ངལ་སོ་དང་ནི་རབ་ཏུ་འཇུག་དང་དབང་དུ་འགྲོ་བའི་རྟ་མཆོག་རྣམས་ཀྱི་རོལ་པ་ཅན་དཔུང་རྟེན་པར་བྱེད། །མཁས་པ་རྣམས་ཀྱི་ས་ལ་བཞུགས་པའི་དབང་པོ་དགའ་བའི་གནས་གྱུར་རབ་མཆོག་རྒྱ་མཚོ་རབ་སྦྱིན་བསྟེན་པར་མཛད་པ། །བརྗོད་པ་རྣམས་
སུ་མཐའི་གོ་འཕང་ཅན་ཁྱོད་ཐེ་ཚོམ་སོ་སོར་བཅོམ་པ་གང་ཞིག་རྒྱུན་དུ་དྲན་པར་བྱེད་ན། །ན་ཚོད་ཀྱིས་རོལ་བློན་པོ་ཅན་གྱི་ཚོགས་ནི་ལྔ་པའི་དབྱངས་དག་སྒྲུབ་པར་བྱེད་པའི་ངལ་སོས་དགའ་བར་བྱ་ལ། །བསིལ་ཟེར་ཅན་གྱི་གདོང་ཅན་མཛེས་མ་དེ་ཡི་དབང་དུ་གྱུར་པ་འདི་ནི་མི་བདག་དཔལ་དང་ལྷན་ཅིག་གྱུར་རོ། །
197-386b

སྣ་ཚོགས་པ་ལ་ཕན་པ་ཀུན་ནས་ཆགས་པ་གཅིག་པུར་བཟོད་པའི་ནང་གི་རྒྱུ་ཡི་བྱེད་པ་ལྷག་པའི་བདག་པོ་ཀྭ་ཡེ། །འདི་ན་གང་ཞིག་ནོར་གྱི་གནས་ལྟར་མཆོག་རབ་ཁྱོད་མཚན་འཛིན་པར་བྱེད་པ་དེ་ཡི་མངོན་དུ་ལྷ་ཡི་གནས་ཀྱི་མཚོའོ། །ཕྱོགས་ཀྱི་གླང་པོ་བྱིངས་པའི་འགྲམ་པ་དག་ལས་འཕོས་པར་གྱུར་པའི་
ཆང་གི་དྲི་བཟང་རབ་ཏུ་བསྒོས་པའི་རོལ་པ་ཅན། །བཞད་དང་ངང་པ་ཁྲུང་ཁྲུང་རྐང་པས་མཚན་ཅིང་གསེར་གྱི་པདྨའི་ནགས་མཐོར་བུང་བའི་ཚོགས་རྣམས་སྒྲ་སྒྲོགས་ཅན་ཡང་འགྲུབ། །མུན་པ་འཇོམས་པར་མཛད་པ་བདུད་ཀྱི་དགྲ་བོ་སྡིག་པ་བཅོམ་པ་རྒྱལ་བའི་སྲས་ཀྱི་ས་ལ་རྒྱན་གྱུར་དགའ་བར་མཛད་པ། །ཤུགས་
སྟོབས་འདུས་པའི་རོལ་སྒེག་དཔལ་ཅན་སྲིད་པ་ཞིག་པ་རྣམས་ཀྱི་གསུང་གི་ལུགས་དག་སྐྱེད་བྱེད་ཕ་རོལ་གནོན་པ། །མཆོག་སྦྱིན་ཁྱོད་ལ་འབྲས་ལྡན་བསྙེན་བཀུར་བརྩམས་པ་བློ་བཟང་རྣམས་སུ་རྣམ་པར་གསལ་བ་རྒྱས་པ་ལོངས་སྤྱོད་ལ་ཆགས་པས་ཀྱང་། །འདི་ན་མཆོག་ཏུ་མི་བཟད་ཡུལ་གྱི་ལུས་འཛིན་ལག་
འགྲོའི་རྣམ་པར་བསྒྱིངས་པ་རང་འདོད་བཞིན་དུ་རྣམ་པར་འདུལ་བར་བྱེད་དོ། །རབ་ཏུ་གསལ་བར་རྒྱུན་ཆད་མེད་པར་དཔག་མེད་བདུད་རྩིའི་བཅུད་ཀྱི་མ་ལྟར་ཡན་ལག་རྣམས་ནི་ཀུན་ནས་རྒྱས་པར་བྱེད་པ་ཡི། །སོ་སོར་ཀུན་དུ་བལྟ་བ་ཡང་དག་སྒྲུབ་བྱེད་གསར་པའི་འདོད་འབྱུང་ཉམས་ཀྱི་གནས་གྱུར་མཚུངས་པ་མེད་
པ་མི་མཉམ་དཔལ་ཅན། །གང་ཞིག་དཀའ་བ་སྤྱོད་པ་རྣམ་པ་སྣ་ཚོགས་ལེགས་བྱས་སྒྲུབ་པ་གཞན་པ་རྣམས་ཀྱིས་རྙེད་པར་སླ་མིན་ཁྱོད་ལ་བརྟེན་པ་ཡི། །ཤིང་གི་འབྲས་བུ་རྒྱུད་པ་མ་ལུས་འཇིགས་བྱེད་ཅེས་བྱ་དེ་འདིར་བརྩོན་པའི་བདག་ཉིད་ཅན་གྱིས་ཡང་དག་ཉམས་སུ་མྱོང་ངོ་། །གཡོ་བར་གྱུར་པའི་ཞབས་ཀྱིས་
བཙིར་བའི་རི་ཡི་དབང་པོ་དང་ལྡན་ས་འོག་རྒན་གྱུར་གྱེན་དུ་འཕྱོང་བའི་ཀླུ་སྐྱོང་གིས་བསྟོད་པ། །ངེས་པར་ལྷུང་བཞིན་པ་ཡི་ཕྱག་དབྱིག་ཚོགས་ཀྱི་ཆར་པ་དྲག་པོ་རབ་ཏུ་ལྡན་པའི་ཆུ་འཛིན་རབ་ཏུ་དྲག་པོའི་རླུང་གིས་ནི། །མཆོག་ཏུ་རོལ་པ་ངལ་བ་ཞི་བ་རྒྱས་བྱེད་ལྟ་བུ་གང་ལ་འཇིགས་པའི་དུས་སུ་དོགས་པས་
འཇིག་རྟེན་གསུམ་པོ་སྐྲག་པར་འགྱུར་བ། །ཐུགས་རྗེ་བཟང་པོས་རྩེན་ཅིང་འཕྲོ་བ་ཁྱོད་ཀྱི་པདྨ་གར་གྱི་དབང་ཕྱུག་རྣམ་པའི་རོལ་པར་འཁྲུངས་པས་རྒྱལ་གྱུར་ཅིག །མཆོག་སྦྱིན་གཞན་ལ་ཕན་པ་དཔག་མེད་དམ་པའི་བུ་ལོན་མཆོག་ཅན་རྐང་པ་སོ་སོར་མངོན་པར་འཕེལ་ལས་དག་པར་འཁྲུངས་ཤིང་འགྱུར་བ་མེད་
197-387a

ལ། །མཐའ་ཡི་ངོ་བོར་སོན་པའི་རྣམ་གསུམ་ཏིང་ངེ་འཛིན་རྣམས་ཡང་དག་རྟོགས་པའི་དབང་ལས་འཕགས་མཆོག་རབ་ཏུ་མང་པོ་རབ་ཏུ་དགྱེས་པ་རྣམས་ཀྱིས། །རབ་ཏུ་སྒྲོགས་མཛད་གང་ལ་རྗེས་སུ་དགའ་བས་ཅ་ཅོ་ཡང་དག་སྒྲོགས་པས་མི་ངོམས་སེམས་ལྡན་ལྷ་རྣམས་ཀྱིས་དཀྲོལ་སིལ་སྙན་
རྒྱ་མཚོའི་སྦྲུལ་ལྟའི། །ཆར་སྤྲིན་རོལ་པའི་སྒྲ་ཡི་འབྱུང་གནས་རབ་མཐོ་དུང་ལ་སོགས་རྣམས་ངལ་བར་མི་བགྲོད་ཁྱོད་ཀྱི་མཐུ་སྟོབས་མཆོག་གི་འདིར་ནི་རྒྱལ་གྱུར་ཅིག །རབ་ཏུ་རྒྱས་པའི་གསེར་གྱི་པདྨའི་སྐལ་བཟང་བརྟེན་པའི་སྐུ་ཅན་རྟེན་བྱེད་རྣམས་ལ་མུན་པར་ཉི་མའི་དངོས་པོ་སྦྱིན་མཛད་པ། །ས་
གསུམ་ཞི་བ་སྒྲུབ་པའི་ཆེད་དུ་མྱ་ངན་འདས་པ་བཟློག་མཛད་ཏ་མ་ལ་ཡི་དབྱིབས་ཅན་སྲིད་པའི་དགྲ་ལ་གུས་ཐོབ་ཀྱི། །མགོན་པོ་སྟོབས་བཅུ་པ་ཡི་སྲས་ཀྱི་ཚོགས་ཀྱི་མཆོག་གྱུར་ངེས་པར་འཁྲུགས་པའི་སྡུག་བསྔལ་འཇོམས་མཛད་ཁྱོད་ལ་དེ་ལྟར་བསྟོད་པ་ཡིས། །གང་ཞིག་རབ་བསགས་དགེ་བའི་ཕུང་པོ་ཆེན་
པོ་དེ་ལས་སྐྱེ་བོའི་ཚོགས་པ་མཐའ་དག་ལ་ཡང་འབྱོར་པ་དེ་ཉིད་འབྱུང་གྱུར་ཅིག །བདག་ཀྱང་ཁྱོད་ཀྱི་ཞབས་པད་མངོན་པར་མཉེས་པར་བྱེད་པའི་དབང་གྱུར་བློ་ཡི་ནང་གི་མུན་པ་ཡང་དག་ངེས་པར་འགགས་པ་སྐྱེས་པ། །མཐའ་དག་དངོས་པོའི་ཕུང་པོ་ལ་ཁྱབ་འདྲིས་པ་རྨི་ལམ་སྒྱུ་མའི་རང་བཞིན་གཉིས་སུ་མེད་
པའི་དེ་ཉིད་ཡང་དག་རྟོགས་པ། །བརྩེ་མེད་རྣམས་ལ་བརྩེ་བའི་སྟོབས་དང་མི་བཟློགས་བརྩོན་འགྲུས་སྐྱེས་དང་རྣམ་པ་སྣ་ཚོགས་བྱ་བ་བརྩམས་པས་བདུད་རྣམས་ནུབ་བྱེད་སྤྱད་ཚུལ། །སྲིད་པ་གསུམ་ལ་མཆོག་ཏུ་ཕན་པ་གཅིག་པུའི་བྱ་བ་ཅན་ནི་སྐྱེ་བོ་གཅིག་མ་གྲོལ་བ་ཇི་སྲིད་དུ་ཡང་སྤྱད་པར་བགྱིའོ། །རབ་རྒྱས་
ཐང་གི་ཆུ་སྐྱེས་བཀྲམ་དང་མཚུངས་པ་འཛིན་པའི་ཞབས་གདན་མཐར་ནི་ལྷ་དང་ཀླུ་དང་ལྷ་མིན་དབང་པོའི་གཙུག་གི་ནོར་བུའི་འོད་ཟེར་ཚོགས་ཀྱིས་མཛེས་པ་ངལ་སོ། །བཟོད་དཀའ་མཆོག་ཏུ་ཆེ་བའི་སྡུག་བསྔལ་མེས་ཉམས་ནུས་པ་འཁྲུགས་པའི་འཇིག་རྟེན་གསུམ་པོ་མྱ་ངན་བྲལ་བར་བྱས་ལ་ངལ་དང་ངལ་སོ་
མེད་པའི་སྤྱོད་པ་རྨད་བྱུང་གཏེར་གྱུར། །རྫོགས་པའི་སངས་རྒྱས་རྣམས་ཀྱི་རིགས་རྒྱུད་དག་པའི་རྒྱན་དུ་རབ་གསལ་གྲགས་པ་རྒྱས་པས་ཕྱོགས་ཀྱི་ཁོངས་དག་ཁྱབ་པ་གཞོན་ནུ་ངག་གི་དབང་ཕྱུག་བཟློག་པར་དཀའ་བ་བདུད་ཀྱི། །དཔའ་བོའི་དམག་དཔུང་ཀུན་གྱི་སྤྲོ་བ་འཇིགས་པར་བྱེད་ལ་མངོན་པར་
197-387b

དགའ་དང་ལྡན་པའི་མཉམ་མེད་ནུས་པ་བཀོད་པས་ཤིན་ཏུ་རབ་གདུང་བྱེད་པ་ཤར་འདིས་རྒྱལ་བར་གྱུར་ཅིག །སྟོབས་ལྡན་རྡོ་རྗེ་བཙུན་མོ་མཆོག་གི་ཡན་ལག་རྣམས་སུ་ཡོངས་སུ་བསྐྱོད་པས་རྣམ་པར་རོལ་མཛད་གསོག་གསོབ་ཚོགས་ལས་འགྲོ་བ་རྒྱལ་བའི་གོ་ཆ། །རྒྱུ་མར་བཅས་ཤིང་ཞག་བཅས་ཁྲག་
དང་ཆང་གི་བཏུང་བས་རྣམ་པར་མྱོས་པས་མ་བསྡམས་རྣམ་འགྱུར་གད་རྒྱངས་ཆེར་བགད་ལྷ་དང་ལྷ་མིན་སྐྲག་མཛད། །ཐུགས་བརྩེ་བ་དང་ཤིན་ཏུ་སྦྱོར་བ་ངོ་མཚར་རང་བཞིན་དཔེ་ཟླ་མེད་པའི་དྲག་པོའི་སྐུ་ཅན་གཉིས་མེད་རྒྱ་མཚོ་ཆེན་པོར་ངེས་པར་ཞུགས་པ། །ཡོན་ཏན་དག་པའི་གཞིར་གྱུར་རྒྱ་ཆེའི་གར་གྱི་ཉམས་
དགུ་རྣམས་དང་ལྡན་པ་རོལ་པའི་སྤྱོད་ཚུལ་ཅན་གྱུར་ཐུགས་རྗེའི་སྟོབས་ལ་མངོན་པར་ཕྱག་འཚལ། །ཞེས་པ་བྱ་དཀའི་བྱེ་བྲག་བྲྀཏྟ་མཱ་ལའི་བསྟོད་པར་མཉམ་པའི་བྲྀཏྟ་རྣམས་སོ། །ཐུགས་རྗེའི་དབང་གིས་འཇུག་པའི་ཚུལ་ཅན་ཁྱོད་ཀྱི་སྐུ། །ཤར་ཀ་མིན་པའི་རི་བོང་ཅན་གྱི་འོད་ཅན་བྱེད། །ཕྱེད་ནི་ཉི་མ་
ཤར་ཀའི་གཟུགས་བརྙན་འཛིན་པ་འདིས། །སུ་ཡི་ཡིད་ནི་འཛིན་པར་མི་བགྱིད་ལགས། །མྱུར་བ་དེ་ཉིད་བདུད་རྩིའི་བཅུད་ཀྱིས་ཚིམ་པའི་ཁྱད་པར་དང་། །མཐའ་དག་ཀུན་དུ་བསྒྲུབས་པའི་དངོས་གྲུབ་དབང་ལས་ཀྱང་ནི། །ཁྱོད་ཀྱི་ཞབས་དག་ཉམས་སུ་མྱོང་བའི་བློ་གྲོས་མེད་པ་རུང་། །འབྱུང་བྱ་མིན་ནོ་སྡིག་པ་
འཇོམས་པ་རིགས་པ་ཀྭ་ཡེ། །གཙོ་བོ་འགྲོ་ལ་ཕན་པ་གལ་ཏེ་ཁྱོད་ཀྱིས་ནི། །གཟིགས་པ་བདུད་རྩིའི་རོ་ཡི་རྒྱུན་དང་དོ་ཤལ་མཛེས་པས། །ཁྱབ་པར་བྱས་པས་དཀར་ལ་མཐོ་བ་དེ་རྣམས་ཀྱིས། །ལུས་འགྱུར་ན་ནི་མཁས་པ་རྣམས་ཀྱི་ལྷག་པ་ཅི་འདོད། །ཞལ་གྱི་དཔལ་ནི་རྒྱས་པར་གྱུར་པ་མཆོག་འདི་ཐུགས་རྗེ། །ཆེན་པོའི་
བློ་ཅན་གཉུག་མའི་བློ་གྲོས་དཔལ་གྱི་བཅུད་རྣམས་དང་། །ཡང་དག་ལྡན་ཞིང་གཡོ་བའི་མཆུ་ཡི་འདབ་མ་ཅན་ནི། །ཤིན་ཏུ་ཡིད་འཕྲོག་གསེར་གྱི་ཆུ་སྐྱེས་རྒྱས་འདོད་བཞིན་དུ་སྣང་། །ཁྱོད་ཀྱི་ཞལ་བཟང་གཞན་འདི་ཨུཏྤལ་བསྡམས་པ་ཡི། །མཛེས་པ་རྣམས་ནི་ཡང་དག་བསགས་པ་བཞིན་དུ་སྣང་ཞིང་། །ཞལ་རས་གཞན་པ་
ཀུ་མུ་ཏ་ཡི་དཔལ་གྱིས་ནི། །ཡང་དག་བསྐྱེད་པ་བཞིན་ཏེ་འདི་འདྲས་ཡིད་འཕྲོག་མཛད་དོ། །འགྲོ་བ་གསུམ་ལས་རྒྱལ་བའི་ངང་ཅན་ཁྱོད་ཀྱིས་ནི། །རོལ་བ་འདི་ཡང་བྱིས་པའི་རོལ་པའོ་གང་ཕྱིར་ལ་ལར། །དོན་སྒྲུབ་པ་ནི་ཐམས་ཅད་བསྐྱོད་ཕྱིར་ཁྱོད་ཀྱིས་ནི། །སྤྱོད་པའི་ཚུལ་འདི་ཨེ་མ་ཕྱེད་མཉམ་པ་རུ་མཐོང་ངོ་། །སྐད་ཅིག་
197-388a

གཅིག་ལ་སྟོབས་ཀྱིས་འཇིག་རྟེན་གསུམ་གྱི། །རྩེ་མོ་ཀུན་ནས་གནོན་པ་ཁྱོད་ཀྱི་ཞལ་མཐོང་ནས། །ཀུན་གྱི་ངག་ནི་རང་གི་བྲན་མོ་བཞིན་དུ། །ཁྱོད་ལ་སྙན་པར་སྨྲ་བར་ཅི་ལྟར་མི་འགྱུར་ལགས། །ཁྱོད་ཀྱི་ཐུགས་རྗེ་གལ་ཏེ་ཤུགས་ལྡན་མི་འགྱུར། །ན་ནི་རང་གི་ངང་གིས་འབྱུང་བའི་ཞི་བའི་ལམ། །བསལ་ནས་བློ་ལྡན་
གྱིས་ཀྱང་རྟོགས་པར་དཀའ་བའི། །སྤྱོད་པ་ཤིན་ཏུ་ངོ་མཚར་བརྒྱ་ཡིས་ཅི་ཞིག་ལག་ལགས། །ཀུན་ལས་ཁྱད་པར་འཕགས་པའི་གཟི་བརྗིད་ཀྱི་གནས། །ཡན་ལག་ཀུན་ཁྱབ་མཚོན་སླ་མཚན་གྱི་དཔལ་ལྡན་ཞིང་། །བཟང་པོ་རྣམ་པར་གསལ་བ་ཁྱོད་སྐུ་ཀུན་གྱིས། །དྲན་པར་གྱུར་པས་ཀྱང་ནི་བཟང་པོ་རྒྱས་པར་མཛད། །གཞན་དོན་མཆོག་ཏུ་
དོན་གཉེར་རྣམས་ཀྱིས་ཁྱོད་སྐུ་ཀུན་ནས་འཕྲོ་ཞིང་མངོན་པར་དགའ་འོས་འོད་ཟེར་གྱི། །རང་བཞིན་རྡོ་རྗེ་པདྨ་རལ་གྲི་ནོར་བུ། །འཁོར་ལོ་རྣམས་ཀྱི་ཏོག་དང་ལྡན་པར་རྣམ་པར་སྣང་། །སེམས་སྐམས་ཙམ་གྱིས་དངོས་པོ་བསྟེན་པའི་སྙིང་རྗེ་ལ་ནི་ཕུན་ཚོགས་གཞན་དང་གཞན་མིན་དོན་འདི་འདྲ་བ་གལ་འབྱུང་། །དེ་འདི་ཁྱོད་ཀྱི་དབྱིབས་ཀྱིས་དོར་
ཏེ་དེ་ཕྱིར་ཆ་ཤས། །སྒྲ་དང་ལྡན་པའི་རྐྱེན་དང་བུད་མེད་རྟགས་ཀྱིས་བརྗོད་པའོ། །འཆར་བཞིན་པ་ཡི་སྐྱ་རེངས་རྣམས་ཀྱི་འོད་ཟེར་ཚོགས་ཀྱིས་ཡོངས་སུ་བསྐོར་བའི། །གསེར་གྱི་རང་བཞིན་དྲི་མ་དང་བྲལ་ཁ་བའི་འོད་ལས་ངེས་རྒྱལ་བ། །འགྲོ་བ་མ་ལུས་མངོན་པར་དགའ་བར་བྱེད་ལ་མཁས་ཤིང་ཤིན་ཏུ་མཛེས་པ། །ཁྱོད་ཀྱི་སྐུ་ལུས་འདི་ཡིས་
རྒྱལ་བར་གྱུར་ཅིག་ཤིན་ཏུ་བྱུང་བ་ཀྱེ། །སྲིད་པ་གསུམ་གྱིས་རྟོགས་པར་དཀའ་བའང་ཞབས་ལ་ཡོངས་སུ་རྒྱུ་བ་ཅན་གྱི་རྣལ་འབྱོར་ལྕི་བ་བཅོམ་ལྡན་བདེ་བར་གཤེགས་པ་དཀར་པོ་མ་ཡིན་པའི། །གཟུགས་བརྙན་དང་མཚུངས་དྲི་མ་རྣམ་པར་བྲལ་བའི་ནོར་བུ་ངེས་པར་བསགས་པས་སྤྲས་ཕྱིར་ལེགས་པར་ཡོངས་སུ་འབྱོར་པའི་ཡོན་ཏན་རྣམས་
ཀྱི་གནས། །རང་གི་ཚུལ་ལུགས་རྗོད་པར་བྱེད་པའི་སྒྲ་ནི་ཞུམ་པ་བརྗོད་པ་ཡང་དག་རྗེས་སུ་བྱེད་ལ་རོ་ཅན་ལྟ་བུའི་ལྷ་ཡི་མེ་ཏོག་དྲི་བཟང་པོ། །ཡོངས་སུ་བྱུགས་པའི་དྲི་བཟང་གིས་འདུས་བུང་བའི་ཚོགས་ཀྱི་འཕུངས་གཏེར་ཁྱོད་ཀྱི་གཙུག་གི་ཕུད་ཀྱིས་རྒྱལ་བར་གྱུར་ཅིག་རྟོགས་པའི་ཆུ་གཏེར་ཀྱེ། །ཡང་དག་དར་བའི་ཕྱོགས་ལ་འདོད་པ་ཉེ་
བར་བབ་པ་རྣམས་ལ་ཡང་དག་དར་བར་བྱེད་པ་རྣམ་པ་སྣ་ཚོགས་མངོན་པར་རྗོད་བྱེད་ཅིང་། །རབ་ཏུ་ཞི་བའི་བདེ་བའི་རོ་ལ་རོ་མྱོང་བློ་ཅན་རྣམས་ལ་དཔེ་ཟླ་མེད་པའི་ཞི་བའི་བདེ་བའི་ལམ་རྗོད་བྱེད་ལ་ལྷུར་ལེན་ཆེན་པོ་ཅན། །དཔག་ཏུ་མེད་པའི་ལེགས་པར་བྱས་པའི་འབྲས་བུ་བློ་ཅན་རྣམས་ལ་ངེས་པར་དྲང་ཞིང་གྱ་གྱུའི་བློ་ཅན་རྣམས་ལ་ཕུལ་
197-388b

དུ་ནི། །དབྱུང་དུ་མེད་པའི་འཁྱོག་པོའི་ཚིག་ཅན་ཁྱོད་ཀྱི་གསུང་གིས་རྒྱལ་བར་གྱུར་ཅིག་ལྷག་པའི་བདག་པོ་རྒྱལ་བའི་ཚུལ་གྱི་འདྲེན་བྱེད་བདུད་རྩིའི་ཁང་པ་ཀྱེ། །གང་ཞིག་ཁྱོད་ལ་བསྟོད་ཅིང་ཁྱོད་ཀྱི་ཡོན་ཏན་རྣམས། །ཀུན་ནས་བཤད་པ་འདི་ཞེས་མངོན་པར་རློམ་བྱེད་པ། །དེ་ནི་ངེས་པར་འཁུར་བ་གང་བའི་ཆུ་ལྡན་པས། །བདག་གི་ཆུ་
གཏེར་ངེས་པར་འཐུངས་སོ་ཞེས་པ་ཉིད། །འོན་ཀྱང་དྲན་པའི་དགྲ་བོ་མ་ལུས་རྣམས་ཀྱིས་ཀྱང་། །བརྗོད་བྱ་ཉིད་ནི་བརྗོད་མི་སྤྱོད་པ་མགོན་ཁྱོད་ཀྱི། །ཡོན་ཏན་རྣམས་ལ་དོན་མེད་མངོན་པའི་ང་རྒྱལ་གྱིས། །བརྗོད་པ་འདི་ནི་ཕྱིན་ཅི་ལོག་པ་སྔ་མ་ཅན། །ཞེས་པ་འཇུག་ཚུལ་ཕྲེང་བ་ཕྱེད་མཉམ་པའི་བྲིཏྟ་རྣམས་སོ། །ཡོན་ཏན་རྒྱ་མཚོ་སྐབས་
གཞན་རྣམས་སུ། །རྒྱ་མཚོ་མ་བསྐམས་བརྒྱད་པོ་ཞབས་ཀྱིས་ཏེ་པོར་བཙིར་ལས། །འཕེལ་བ་རྣམས་ཀྱིས་གོར་མོའི་ཁུང་བུ་གང་བ་མིན་ཞིང་བཟོད་བྱ་མིན་པ། །ཞབས་ཅན་མི་མཉམ་པ་ནི་རྐང་པ་བཞི་པོ་གོང་མ་ཅན་གྱི་ཐུགས་རྗེའི་དགོངས་པ་ཐོབ་བྱེད། །ཅེས་པས་ངེས་པར་བསྒྲགས་པའི་རང་བཞིན། །མི་ཟད་ཞབས་ཀྱི་བཀོད་པ་བྱ་ཞིང་
ཡང་བ་དང་ནི། །ལྕི་བའི་ངེས་པ་འཛིན་ལ་གལ་ཏེ་ཁྱོད་ཀྱིས་ངེས་པར་མངོན་པར་སྨྲེ་སྔགས། །ཚིག་སྒྲུབ་པ་ལ་རྗེས་སུ་གདུང་བར་མི་འགྱུར་བ་ནི་འཇིགས་པར་འགྱུར་བ་མིན་པ་སུ་ཡིན། །མ་རུངས་སྐྱེ་བོ་འདུལ་བར་བྱེད་ཅིང་། །རྣམ་པར་གཙིགས་པའི་སྐུ་ལུས་སྟོན་པར་མཛད་པ་ཁྱོད་ཀྱིས། །མེ་ཏོག་ཁ་འབུས་འདི་ནི་གྲོང་གསུམ་འཕྲོག་པའི་ཅོད་
པན་ནོར་བུ་འདྲ་དང་། །ཤིན་ཏུ་ཡུན་རིངས་ཕན་པའི་བློ་གྲོས་ངེས་པར་མཛད་པའི་སྡོང་བུའི་མྱུ་གུ་བཞིན་དུ་སྣང་ངོ་། །ཁྱོད་ཀྱི་སྤྱན་གྱིས་ཅུང་ཟད་གཏད་པའི་རོལ་པ་རབ་ཏུ། །སྟོབས་ལྡན་མངོན་པར་མངོན་པར་ཕྱོགས་པས་མེ་ཆེན་སྟུག་པོ་འཇིགས་སུ་རུང་བའི། །དྲ་བ་རབ་ཏུ་རྒྱས་པའི་ནམ་མཁའི་མཐིལ་དུ་བར་མཚམས་མེད་པ་འཛིན་པར་བྱེད་ཅིང་
གཤིན་རྗེ། །ཡང་ནི་རབ་ཏུ་ཞི་བར་མཛད་དོ། །འདི་ནི་ཁོ་ན་སྡིག་པ་དྲག་པོ་དུག་གི་ཕུང་པོ། །མཐའ་དག་རབ་ཏུ་ཞི་བྱས་སླར་ཡང་སྐྱེ་བོ་འཇམ་པོའི་རྗེས་སུ་ཡང་དང་། །ཡང་དུ་མངོན་པར་གསར་པའི་བདེ་བ་མཉམ་པ་མེད་པའི་གཏེར་དག་ཀུན་དུ་འདྲེན་པར་བྱེད་ཅིང་། །ངེས་པར་གྱུར་པའི་བདུད་རྩིའི་རྒྱུན་ལགས། །དབང་པོ་སྐུ་ལུས་ཆུ་གཏེར་ཕུང་པོ་
གློག་གིས། །མཆོག་ཏུ་འབར་ཞིང་ཆུ་ཡི་ཁུར་གྱིས་ལྗིད་ལ། །འཇིགས་རུང་འབྲུག་སྒྲ་ཆེ་ལྡན་ཐུགས་རྗེ་ལྕི་ཡང་གིས། །འགྲོ་བ་རྒྱུན་དུ་འཕགས་པ་འདི་ཡིས་རྒྱལ་གྱུར་ཅིག །འདི་ཉིད་ཕྱིར་ན་ཤིན་ཏུ་བྱ་བ་དཀའ་བ་ཡི། །རྣམ་པར་རོལ་པ་བརྒྱ་རྣམས་རྒྱས་པར་མཛད་པ། །ཁྱོད་ཀྱིས་གསལ་བར་གྲགས་པའི་དྲི་བཟང་ཉིད་ཀྱིས། །རྨད་དུ་བྱུང་བ་འདི་ཡིས་
197-389a

འཇིག་རྟེན་མ་ལུས་ཚིམ་པར་མཛད། །ཁྲོ་གཉེར་གཟིགས་སྟངས་ཅན་གྱི་ཚེམས་རྣམས་ལ་ནི། །རྣམ་པར་འགྱུར་རྣམས་ཅི་ཡང་རྣམ་པར་འཛིན་པ། །ཁྱོད་ཀྱི་སྐུ་ལུས་རྒྱལ་བར་གྱུར་ཅིང་འོན་ཀྱང་གང་ཞིག །མི་བཟད་འདི་འདྲ་བ་ཡིས་འཇིག་རྟེན་པ་རྣམས་འདུལ་བར་མཛད་ལ། །རི་ཡི་བྱ་སྐྱིབས་འཇིགས་པ་རྨད་བྱུང་ཕུལ་བྱུང་དེ་འདྲ་
བ་ཡང་། །འགྲོ་ལ་མི་ཕན་གཞོམ་པའི་ཆེད་དུ་ཀུན་དུ་མཉམ་དུ་ནི། །ཁྱོད་ཀྱིས་དལ་བུར་གཤེགས་པ་རོལ་པ་དང་། །བཅས་ལའང་ཕུལ་དུ་དབྱུང་དུ་མེད་པའི་མགྱོགས་ལྡན་རླུང་གི་རྗེས་འགྲོ་མིན། །གཞན་ཡང་བཅོམ་ལྡན་འདས་ཀྱི་ཁྱུ་མཆོག་རླབས་པོ་ཆེའི། །གནས་ནི་མཚུངས་པ་མེད་པ། །དག་པར་སྣང་བའི་ཁྱད་པར་ཅན། །འཛིན་པ་ཁྱོད་
ནི་རྟེན་དུ་ཐོབ་པ་དེ། །དེ་ཕྱིར་གཞན་པ་མི་མཉམ་རྣམས་ཀྱི། །མགོ་བོར་རྐང་པ་ངེས་པར་འཇོག །བསམ་པ་གཅིག་པ་ཕུན་སུམ་ཚོགས་པས། །ཁྱོད་མཉེས་བྱས་ནས། །དགེ་བ་དྲི་མ་མེད་པ། །འཕེལ་བ་བཞིན་པ་ཞེས་གང་ཡོད་པ། །དེ་ལས་འཇིག་རྟེན་མ་ལུས་འདི་རྣམས་ཤིན་ཏུ་སྤྱོད་ཚུལ། །ཁྱད་པར་རྣམས་ཀྱིས། །ཁྱོད་ཀྱིས་མངོན་པར་དགོངས་པའི། །
གོ་འཕང་ཆེན་པོར། །མཆོག་ཏུ་འགྲོ་བར་གྱུར་ཅིག །གཞན་ཡང་། ངེས་པར་འདོད་བྱ་དྲི་མ་མེད་པས། །དགེ་བ་འདི་ནི། །སླར་ཡང་། རབ་ཏུ་བསགས་པར་བྱས་པས། །ལུས་དང་ལྡན་པ། །མཐའ་དག་རྣམས་ཀྱི། །སྲིད་པ་ཡིས། །མཚན་མོ་ལས་བྱུང་། །མུན་པའི་ཕུང་པོ། །རྣམ་པར་བྲལ་གྱུར་ཅིག །གཞན་ཡང་། སྟོབས་ལྡན་ཤེས་རབ་རབ་དཀར། །ཀུན་ནས། །
འཁྱུད་པས། །ལུས་མེད་རྩེན་པ། །འདི་རུ་གཟིངས་ཆེན་པོ་ལ། །མཛེས་པ་བསགས་པའི། །རང་བཞིན་ལྟ་བུའི་ལུས་ནི། །ཕུལ་དུ་དབྱུང་དུ་མེད་པའི། །སྙིང་རྗེ་ཅན། །འབབ་བྱེད་ཅིང་། །ཉམས་སུ་མྱོང་འགྱུར། །ཁྱོད་ལ། །སྣ་ཚོགས། །འཇུག་ཚུལ་རྣམས་ཀྱིས། །དེ་ལྟར་བསྔགས་པས། །དགེ་བ་ཟླ་བའི་འོད་ཟེར། །དྲི་མེད་བསགས་པ་གང་ཡིན། །དེ་ལས་འཇིག་རྟེན། །
མྱ་ངན་ལས་ནི། །ཡོངས་གྲོལ་བ། །བདེ་བ། །ཆེན་པོས། །ཁྱབ་པའི། །རྩེ་མོ་གྲོགས། །མཆོག་འབྱུང་འགྱུར། །འཕགས་པ། །འཇམ་པའི་དབྱངས་ཀྱི་བསྟོད་པ། །བྱ་དཀའ་བའི་ཁྱད་པར་འཇུག་ཚུལ་གྱི་ཕྲེང་བ། །མཁས་པ་ཆེན་པོ་གནས་བརྟན་ཡེ་ཤེས་དཔལ་བཤེས་གཉེན་གྱིས་མཛད་པ་རྫོགས་སོ།། །།འདི་ཡི་གེ་བཅུ་གཉིས་པའི་ཚིགས་བཅད་བཅུ་གཉིས་
པ་ཡ་མུ་ན་ཡན་ཆད། ཤོང་སྟོན་ལོ་ཙཱ་བ་ཆེན་པོ་རྡོ་རྗེ་རྒྱལ་མཚན་གྱིས་བསྒྱུར་ཏེ་འཕྲོ་ལ་ལུས་པ་ལས་ཤོང་སྟོན་དེ་ཉིད་ཀྱི་བརྒྱུད་པའི་སློབ་མ་དཔང་ལོ་ཙཱ་བ་དགེ་སློང་དཔལ་ལྡན་བློ་གྲོས་བརྟན་པས། སློབ་དཔོན་ཤཱཀྱ་རཀྵི་ཏས་མཛད་པའི་འགྲེལ་པ་ལ་བརྟེན་ནས། ཡོངས་སུ་རྫོགས་པར་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།


目录
ཡི་གེ་བཅུ་གཉིས་པ།